संसदमा एमालेको गर्जन: नीति तथा कार्यक्रममाथि उठाए ८ गम्भीर प्रश्न, रास्वपा र सेनाको भूमिकामाथि पनि टिप्पणी

बकपत्र संवाददाता       २ हप्ता अगाडी प्रकाशित     21 No Comments

काठमाडौँ — संघीय संसदको जारी बैठकमा प्रमुख प्रतिपक्षी दल नेकपा (एमाले) ले सरकारले प्रस्तुत गरेको नीति तथा कार्यक्रममाथि कडा प्रहार गरेको छ। एमालेका तर्फबाट नेता रघुजी पन्तले सरकारको मौनता र राष्ट्रिय सुरक्षाका विषयमा ८ वटा गम्भीर प्रश्न उठाउँदै सदन तताएका छन्।

​पन्तले राष्ट्रियता, सेनाको भूमिका, र पछिल्लो समय उदाएको राष्ट्रिय स्वतन्त्र पार्टी (रास्वपा) का गतिविधिमाथि केन्द्रित रहेर सरकारको आलोचना गरेका हुन्।

​सेना र राष्ट्रियतामाथि प्रश्न

एमालेले उठाएको प्रमुख प्रश्नमध्ये नेपाली सेनाको भूमिका पनि एक रहेको छ। “लिपुलेकमा अतिक्रमण हुँदा बेखबर हुने सेना सुकुम्बासी बस्तीमा किन परेड खेल्दैछ?” भन्दै एमालेले सेनाको परिचालनको प्राथमिकतामाथि प्रश्न उठाएको छ। त्यसैगरी, देशका विभिन्न भागमा भइरहेका अराजक गतिविधि र “राष्ट्रको प्रमुख रक्षक” मौन बसेकोमा पन्तले आश्चर्य प्रकट गरे।

​रास्वपा र सरकारको नीतिमाथि प्रहार

पछिल्लो समय सत्तामा रहेको रास्वपा र सो पार्टीका मन्त्रीहरूका निर्णयमाथि पनि एमालेले कटाक्ष गरेको छ। “ऋण लिएर विकास हुन्न भन्नेले सरकारको पहिलो बैठकबाटै अर्बौं ऋण स्वीकृत किन गर्छन्?” भन्दै उनले सरकारको नीति र व्यवहारमा देखिएको विरोधाभाषलाई उजागर गरे। शिक्षक, कर्मचारी र पेशाकर्मीहरूको संगठित हुन पाउने मौलिक अधिकारमाथि हस्तक्षेप भएको विषयमा सरकारको ‘घण्टी’ किन बज्दैन भन्दै उनले रास्वपाको चुनाव चिन्हमाथि व्यङ्ग्य गरे।

​सदनको अराजकता र लाचारी

संसदमा भइरहेका अभद्र व्यवहार र सभामुखको भूमिकामाथि पनि एमालेले असन्तुष्टि जनाएको छ। प्रतिनिधि सभामा बारम्बार असभ्य र अराजक आचरण प्रदर्शन हुँदा पनि सदन र सभामुख किन लाचार छन् भन्ने एमालेको ८औं प्रश्न थियो।

​यसरी, एकातिर सडकमा बस दुर्घटनामा परेका नागरिकहरू उपचार नपाएर छट्पटाइरहेका समाचार आइरहँदा, अर्कोतिर सदनमा राजनीतिक दलहरूबीच राष्ट्रियता र सुशासनका नाममा वाकयुद्ध चलिरहेको छ। नागरिकका आधारभूत समस्या जस्तै सडक सुरक्षा, बिजुलीका नाङ्गो तार व्यवस्थापन र महंगीलाई नीति तथा कार्यक्रमले कति सम्बोधन गर्छ, त्यो भने हेर्न बाँकी नै छ।

​एमालेले उठाएका यी ८ प्रश्नले आगामी दिनमा सत्तापक्ष र प्रतिपक्षबीचको दूरी अझ बढाउने संकेत गरेको छ।

बकपत्र संवाददाता

बकपत्र डटकम-नेपालकाे सुशासन, सामाजिक न्याय र समृद्धिकाे क्षैत्रमा काम गर्ने डिजिटल पत्रिका हाे।