प्रधानमन्त्रीको उपस्थितिको माग गर्दै विपक्षीको अवरोध: प्रतिनिधिसभा बैठक १५ मिनेटका लागि स्थगित

बकपत्र संवाददाता       २ हप्ता अगाडी प्रकाशित     19 No Comments

​काठमाडौं । प्रधानमन्त्री बालेन (बालेन्द्र) शाहको अनुपस्थितिलाई लिएर विपक्षी दलहरूले कडा विरोध जनाएपछि बुधबारको प्रतिनिधिसभा बैठक १५ मिनेटका लागि स्थगित भएको छ। सरकारको नीति तथा कार्यक्रममाथिको छलफलमा प्रधानमन्त्री स्वयं उपस्थित हुनुपर्ने अडान राख्दै विपक्षी सांसदहरूले सदन अवरुद्ध गरेका हुन्।

​बैठक सुरु हुनासाथ विपक्षी दलका सांसदहरूले आसनबाट उठेर प्रधानमन्त्रीको अनुपस्थितिको विरोध गरेका थिए। उनीहरूले मुलुकको मुख्य नीति र योजनामाथि छलफल हुँदा सरकार प्रमुख नै सदनमा अनुपस्थित हुनु संसदीय मर्यादा र लोकतान्त्रिक जवाफदेहिता विपरीत भएको भन्दै चर्को नाराबाजी गरेका थिए।

​विपक्षी सांसदहरूले भने, “सरकारको नीति तथा कार्यक्रम प्रधानमन्त्रीले नै संसदमा प्रस्तुत गर्ने र त्यसमाथि उठेका प्रश्नको जवाफ दिने स्थापित परम्परा हो। तर, प्रधानमन्त्री शाहले संसदलाई बेवास्ता गर्दै अर्थमन्त्रीलाई जवाफ दिने जिम्मेवारी सुम्पनुले जनप्रतिनिधिमूलक संस्थाको अपमान भएको छ।”

​सभामुखले बैठकलाई नियमित कार्यसूचीमा अगाडि बढाउन पटक-पटक आग्रह गरे पनि सांसदहरूको विरोध नरोकिएपछि सदनको कारबाही १५ मिनेटका लागि रोक्न बाध्य हुनुपरेको थियो। आजको कार्यसूचीमा राष्ट्रपति रामचन्द्र पौडेलले प्रस्तुत गरेको आगामी आर्थिक वर्षको नीति तथा कार्यक्रममाथि सांसदहरूले धारणा राख्ने र संशोधन प्रस्तावहरू प्रस्तुत गर्ने कार्यक्रम तय थियो।

​प्रधानमन्त्री नियुक्त भएयता सदनमा एक पटक पनि सम्बोधन नगरेका र संसदीय प्रक्रियाभन्दा सामाजिक सञ्जालमा बढी केन्द्रित भएको भन्दै बालेन शाहको यतिबेला चौतर्फी आलोचना भइरहेको छ। विपक्षीहरूले प्रधानमन्त्री सदनमा उपस्थित नभएसम्म छलफल अगाडि बढ्न नदिने चेतावनी समेत दिएका छन्।

बकपत्र संवाददाता

बकपत्र डटकम-नेपालकाे सुशासन, सामाजिक न्याय र समृद्धिकाे क्षैत्रमा काम गर्ने डिजिटल पत्रिका हाे।