काठमाडौं । काठमाडौंको इन्द्रचोकस्थित एक ज्वेलरी पसलमा पेस्तोल देखाएर लुटपाट प्रयास गर्ने समूहका तीन जनालाई प्रहरीले पक्राउ गरेको छ। पक्राउ पर्नेहरूमा भक्तपुर ठिमीका ३० वर्षीय विकेश राजवाहक, काठमाडौं डल्लुका ३४ वर्षीय अरुण भुजेल र ललितपुर महालक्ष्मीका हरिकृष्ण महर्जन रहेका छन्।

राजवाहक र भुजेललाई जिल्ला प्रहरी परिसर काठमाडौंको टोलीले नियन्त्रणमा लिएको हो भने महर्जनलाई काठमाडौं उपत्यका अपराध अनुसन्धान कार्यालयले पक्राउ गरेको हो। गत १७ वैशाखमा इन्द्रचोकको एक गहना पसल छिरेका उनीहरूले पेस्तोल ताक्दै लुट्ने प्रयास गरेका थिए। तर, पसलमा रहेकी महिलाले असाधारण साहस देखाउँदै प्रतिकार गरेपछि लुटेराहरू रित्तो हात भाग्न बाध्य भएका थिए। उक्त घटनाको सीसीटीभी फुटेज सामाजिक सञ्जालमा भाइरल बनेको थियो, जसले प्रहरीलाई अपराधी पहिचान गर्न मद्दत पुर्यायो।

अनुसन्धानका क्रममा यस समूहले यसअघि २१ पुसमा काठमाडौं-२५ स्थित मांसान गल्लीको एक होलसेल पसलमा पनि लुटपाट गरेको खुलेको छ। त्यहाँ उनीहरूले पेस्तोल देखाएर २ तोला सुनको सिक्री, ४ लाख नगद, दुई थान मोबाइल र प्रमाण मेटाउन सीसीटीभी क्यामेरा समेत लुटेर लगेको परिसरका एसपी पवनकुमार भट्टराईले जानकारी दिए।

प्रहरीले उनीहरूको साथबाट एक थान चाइनिज पेस्तोल, म्यागजिन, एक थान गोली र फलामको ‘नक’ बरामद गरेको छ। साथै, घटनाका बेला प्रयोग गरिएका लुगाकपडा र लुटपाटमा प्रयोग गरिएको स्कुटर समेत बरामद गरिएको छ।

साहसी महिलाको प्रतिकारका कारण विफल भएको यो लुटपाट प्रयासले काठमाडौंको सुरक्षा चुनौतीलाई पुनः सतहमा ल्याएको छ। पक्राउ परेका तीनै जनामाथि हातहतियार तथा खरखजाना र डाँका चोरी कसूरमा थप अनुसन्धान भइरहेको प्रहरीले जनाएको छ। उनीहरूको पक्राउले उपत्यकामा हुने संगठित लुटपाटका घटनामा कमी आउने विश्वास लिइएको छ।