दीपक भट्टसँगको साझेदारी र सेयर विवादमा गृह मन्त्री सुधन गुरूङको राजीनामा

बकपत्र संवाददाता       १ महिना अगाडी प्रकाशित     54 No Comments

गुरूङले सामाजिक सञ्जाल फेसबुकमार्फत राजीनामा घोषणा गर्दै ‘स्वार्थको द्वन्द्व’ (Conflict of Interest) नहोस् र आफूमाथि लागेका आरोपमा निष्पक्ष छानबिन होस् भन्ने उद्देश्यले मार्गप्रशस्त गरेको उल्लेख गरेका छन्। उनले गत चैत १३ गते मात्रै मन्त्रीको शपथ लिएका थिए।

काठमाडौँ । गृह मन्त्री सुधन गुरूङले पदभार सम्हालेको एक महिना नबित्दै बुधबार आफ्नो पदबाट राजीनामा दिएका छन्। सेयर लगानीको स्रोत, सम्पत्ति विवरणमा देखिएको विसंगति र सम्पत्ति शुद्धीकरण अनुसन्धानका क्रममा हिरासतमा रहेका विवादास्पद व्यवसायी दीपक भट्टसँगको व्यावसायिक साझेदारीमा प्रश्न उठेपछि उनले राजीनामा दिएका हुन्।

गुरूङले सामाजिक सञ्जाल फेसबुकमार्फत राजीनामा घोषणा गर्दै ‘स्वार्थको द्वन्द्व’ (Conflict of Interest) नहोस् र आफूमाथि लागेका आरोपमा निष्पक्ष छानबिन होस् भन्ने उद्देश्यले मार्गप्रशस्त गरेको उल्लेख गरेका छन्। उनले गत चैत १३ गते मात्रै मन्त्रीको शपथ लिएका थिए।

के हो सेयर लगानीको मुख्य विवाद?

गृह मन्त्री गुरूङले सार्वजनिक गरेको सम्पत्ति विवरणमा ४ करोड ३१ लाख ५६ हजार रुपैयाँ बराबरको सेयर स्वामित्व देखाएका छन्। यस लगानीको स्रोतबारे मिडियामा प्रश्न उठेपछि उनले सोमबार ‘ऋण लिएर सेयर किनेको’ स्पष्टीकरण दिएका थिए। तर, उनको स्पष्टीकरण र सम्पत्ति विवरणका तथ्याङ्कहरू बीच गम्भीर विरोधाभास देखिएको छ:

• ऋण लुकाएको आरोप: गुरूङले स्पष्टीकरणमा २०८० भदौ २९ गते लिखित तमसुक गरेर ऋण लिएको दाबी गरे पनि मन्त्रिपरिषद्मा बुझाएको सम्पत्ति विवरणमा ‘ऋण’ सम्बन्धी कोलम खाली छाडेका छन्। उनले स्रोतमा ‘व्यवसाय, पैतृक सम्पत्ति र लगानी’ उल्लेख गरेर ऋणको तथ्य लुकाएको देखिन्छ।
• संस्थापक सेयरको हिस्सा: उनले विवरणमा सबै सेयरलाई ‘साधारण’ भनेर उल्लेख गरेका छन्। तर वास्तविकतामा ५३ लाख रुपैयाँको सेयर मात्र दोस्रो बजारबाट (एनआरएन इन्फ्रास्ट्रक्चर) किनिएको छ भने बाँकी २ करोड २१ लाखभन्दा बढीको सेयर संस्थापक हिस्सा हो।
• अस्वाभाविक कारोबार: दोस्रो बजारमा उनी गृह मन्त्री हुनुभन्दा ५ दिनअघि मात्रै सक्रिय देखिएका छन्। चैत ८ गते मात्रै उनले एकै दिन ७ पटक सेयर कारोबार गरेको रेकर्डले उनको लगानीको प्रकृतिमा शंका उब्जाएको छ।

दीपक भट्टसँगको सम्बन्ध र नैतिकताको प्रश्न

राजीनामाको मुख्य कारण हाल हिरासतमा रहेका व्यवसायी दीपक भट्टको पहलमा स्थापित कम्पनीहरूमा गुरूङको संस्थापक सेयर हुनुलाई मानिएको छ। स्टार माइक्रो इन्स्योरेन्स र लिबर्टी माइक्रो इन्स्योरेन्स जस्ता कम्पनीमा भट्ट र गुरूङबीचको व्यावसायिक साझेदारीले ‘सेटिङ’ को आशंकालाई बल पुर्‍याएको थियो।

गुरूङले आफ्नो राजीनामा पत्रमा लेखेका छन्, “मेरो लागि पदभन्दा ठूलो नैतिकता हो र जनविश्वासभन्दा ठूलो शक्ति कुनै हुँदैन। ४६ जना भाइबहिनीको रगत र बलिदानको आडमा बनेको सरकारमाथि कसैले प्रश्न गर्छ भने त्यसको जवाफ नैतिकता हो।”

अनुत्तरित प्रश्नहरू

गुरूङले राजीनामा दिए पनि उनीमाथि उठेका ५ मुख्य प्रश्न अझै अनुत्तरित छन्: १. ४ करोड ३१ लाखको सबै सेयर ऋणबाटै किनिएको हो कि केही मात्र? २. सम्पत्ति विवरण भर्दा ऋणको विवरण किन लुकाइयो र झुटो स्रोत देखाइयो? ३. साधारण र संस्थापक सेयरको वर्गीकरणमा किन ढाँटियो? ४. दीपक भट्टको कम्पनीमा संस्थापक सेयर हुनु र उनीसँगको गहिरो सम्बन्धको आधार के हो? ५. गृहमन्त्री हुनुभन्दा ठिक अगाडि मात्रै किन दोस्रो बजारमा ठूलो कारोबार गरियो?

गुरूङको राजीनामासँगै अहिले देशमा चलिरहेको ‘जेनजी’ (Gen-Z) आन्दोलन र सुशासनको मागले थप चर्चा पाएको छ। उनले सञ्चारकर्मी र युवाहरूलाई सत्य र इमानदारीको बाटोमा उभिन अपिल गर्दै अन्य कतिपय मिडियाकर्मीहरूको पनि ‘स्विट सेयर’ रहेको दाबी गर्दै प्रश्न छाडेका छन्।

बकपत्र संवाददाता

बकपत्र डटकम-नेपालकाे सुशासन, सामाजिक न्याय र समृद्धिकाे क्षैत्रमा काम गर्ने डिजिटल पत्रिका हाे।