​नीति तथा कार्यक्रम बीचमै छाडेर हिँडेको भन्दै प्रधानमन्त्री बालेनको तीव्र आलोचना; दुलालद्वारा ‘अमर्यादित’ व्यवहारको संज्ञा

बकपत्र संवाददाता       १ महिना अगाडी प्रकाशित     35 No Comments

काठमाडौं । संघीय संसद्को संयुक्त बैठकमा राष्ट्रपतिले सरकारको वार्षिक नीति तथा कार्यक्रम प्रस्तुत गरिरहँदा प्रधानमन्त्री बालेन्द्र (बालेन) शाह बैठक कक्षबाट बाहिरिएपछि राजनीतिक वृत्तमा नयाँ तरंग पैदा भएको छ। प्रधानमन्त्रीको यो कदमलाई प्रमुख प्रतिपक्षी दलका नेताहरूले संसदीय मर्यादा र संवैधानिक परम्पराको ठाडो उल्लंघन भन्दै आलोचना गरेका छन्।

​नेपाली कम्युनिस्ट पार्टीका प्रमुख सचेतक युवराज दुलालले प्रधानमन्त्री शाहको उक्त व्यवहारलाई ‘अमर्यादित, अभद्र र गैरजिम्मेवार’ प्रवृत्तिको पराकाष्ठा भएको आरोप लगाएका छन्। राष्ट्रपति रामचन्द्र पौडेलले आगामी आर्थिक वर्ष २०८३/८४ को नीति तथा कार्यक्रम वाचन गरिरहेकै अवस्थामा प्रधानमन्त्री बीचमै उठेर हिँड्नुले संसदीय प्रणालीको उपहास गरेको दुलालको तर्क छ।

​’संसदीय मर्यादाको अपमान’

​घटनाको भर्त्सना गर्दै प्रमुख सचेतक दुलालले सामाजिक सञ्जाल र सञ्चारकर्मीहरूसँगको कुराकानीमा भने:

​”आफूले हस्तान्तरण गरेको र आफ्नै नेतृत्वको सरकारको नीति तथा कार्यक्रम राष्ट्रपतिले वाचन गरिरहँदा, त्यो पनि आधा सकिन नपाउँदै संसद् छाडेर हिँड्नु प्रधानमन्त्री पदको गरिमा विपरीत छ। यो राष्ट्रपतिको मात्र नभई सम्पूर्ण सार्वभौम संसद्कै अपमान हो।”

​उनले थप अगाडि भने, “यस्तो अभद्र प्रवृत्तिले लोकतान्त्रिक संस्कारलाई कमजोर बनाउँछ। प्रधानमन्त्रीले जिम्मेवारी र उत्तरदायित्वबाट पन्छिन खोजेको प्रस्ट देखिन्छ।”

​सदनमा अन्योल र प्रतिक्रिया

​राष्ट्रपतिले सम्बोधन गरिरहँदा प्रधानमन्त्री अचानक सिटबाट उठेर बाहिरिएपछि केही समय सदनमा अन्योल छाएको थियो। विपक्षी दलका सांसदहरूले यसलाई सरकारको संसद्प्रतिको अनुत्तरदायी व्यवहारका रूपमा अथ्र्याएका छन्।

​प्रधानमन्त्री सचिवालयले भने यसबारेमा आधिकारिक स्पष्टीकरण दिइसकेको छैन। तर, बालेन शाहको यो कदमले सत्तापक्ष र प्रतिपक्षबीचको सम्बन्धमा थप तिक्तता ल्याउने देखिएको छ। नीति तथा कार्यक्रममाथिको छलफल सुरु हुनुअघि नै प्रधानमन्त्रीको व्यवहारलाई लिएर संसद्मा चर्को आवाज उठ्ने संकेत देखिएको छ।

​संविधानतः सरकारको प्रमुखका हैसियतले प्रधानमन्त्रीले राष्ट्रपतिको सम्बोधनभर उपस्थित रहनुपर्ने संसदीय अभ्यास रहिआएको छ। यसअघि पनि प्रधानमन्त्री शाहका कतिपय कार्यशैलीलाई लिएर आलोचना हुने गरे पनि संसद्को उच्च मर्यादा जोडिएको कार्यक्रममा भएको यो घटनालाई राजनीतिक विश्लेषकहरूले गम्भीरतापूर्वक लिएका छन्।

बकपत्र संवाददाता

बकपत्र डटकम-नेपालकाे सुशासन, सामाजिक न्याय र समृद्धिकाे क्षैत्रमा काम गर्ने डिजिटल पत्रिका हाे।