मौसम पूर्वानुमान: मध्यमदेखि भारी वर्षाको जोखिम, रात्रिकालीन यात्रा नगर्न सुझाव

बकपत्र संवाददाता       १ महिना अगाडी प्रकाशित     56 No Comments

काठमाडौँ । जल तथा मौसम विज्ञान विभाग र मौसमविद्हरूले आज र भोलि देशका विभिन्न भागमा मध्यमदेखि भारी वर्षाको सम्भावना रहेकाले विशेष सतर्कता अपनाउन आग्रह गरेका छन्। वर्षासँगै आउन सक्ने आकस्मिक बाढी, पहिरो र सडक अवरोधको जोखिमलाई मध्यनजर गर्दै जोखिमयुक्त सडकहरूमा रात्रिकालीन यात्रा नगर्न सुझाव दिइएको छ।

वर्षाको मात्रा र क्षेत्र विस्तार
मौसमविद्हरूका अनुसार आज (वैशाख १५ गते) रातिदेखि वर्षाको मात्रा र क्षेत्र बढ्दै जाने पूर्वानुमान छ। १५ गतेको तुलनामा १६ गते बढी वर्षा हुने सम्भावना छ। काठमाडौँ उपत्यकासहित आसपासका क्षेत्र र पूर्वी नेपालको मेचीसम्मै आज बेलुकीदेखि ठूलो वर्षा हुन सक्छ। बुधबार र बिहीबार पनि पूर्वदेखि पश्चिमको त्रिशूली-कालिगण्डकी क्षेत्रसम्म बेला-बेलामा वर्षा भइरहने देखिएको छ।

यात्रामा सतर्कताको आह्वान
मौसमविद् उज्वल उपाध्यायले त्रिभुवन, पृथ्वी, सिद्धार्थ, पासाङल्हामु र बीपी राजमार्ग जस्ता पहाडी सडकहरूमा मंगलबार, बुधबार र बिहीबार रातिको समयमा यात्रा नगर्न सल्लाह दिएका छन्। पहाडी क्षेत्रमा पहिरो जान सक्ने र खोला खोल्सीहरूमा आकस्मिक बाढी आउने जोखिम रहेकाले सुरक्षित रहन आग्रह गरिएको छ।

प्रणालीको शक्ति र प्रभाव
भारतको उत्तराञ्चल र हिमाञ्चल प्रदेशतिर रहेका दुईवटा प्रि-मनसुन प्रणालीहरू नेपालमा प्रवेश गरी एकापसमा मिसिएका छन्। “ती दुई प्रणालीसँगै नेपालको स्थानीय प्रणाली समेत थपिँदा जोखिम बढेको हो,” मौसमविद् उपाध्यायले बताए। मेचीदेखि कर्णालीको बीचमा कुनै-कुनै ठाउँमा छोटो समयमै एकदमै ठूलो पानी पर्न सक्ने र निकास नभएका ठाउँमा डुबान हुन सक्ने सम्भावना छ।

प्रदेशगत जोखिमको अवस्था
मौसम पूर्वानुमान महाशाखाका अनुसार वैशाख १५ र १६ गते कोशी, मधेश, बागमती र गण्डकी प्रदेशका पहाडी तथा हिमाली क्षेत्रमा मध्यमदेखि भारी वर्षाको सम्भावना छ। विभागले सातै प्रदेशका जिल्लाहरूलाई पहेँलो रङ्गले सङ्केत गर्दै मौसमको अद्यावधिक जानकारी लिएर मात्र काम गर्न सतर्क गराएको छ। कोशी र मधेश प्रदेशका केही स्थान तथा बागमती र गण्डकीका पहाडी भू-भागमा भारी वर्षाको उच्च जोखिम रहेकाले नदी तटीय क्षेत्र र भिरालो जमिनमा रहेका बासिन्दालाई थप चनाखो रहन मौसमविद् सरोज पुडासैनीले सुझाव दिएका छन्।

बकपत्र संवाददाता

बकपत्र डटकम-नेपालकाे सुशासन, सामाजिक न्याय र समृद्धिकाे क्षैत्रमा काम गर्ने डिजिटल पत्रिका हाे।