ठगी र आपराधिक विश्वासघातको आरोपमा नेपाल इन्भेस्टमेन्ट मेगा बैंकका सीईओ पाण्डे पक्राउ

बकपत्र संवाददाता २ हप्ता अगाडी प्रकाशित 36 No Comments

📋 सारांश

✓ नेपाल इन्भेस्टमेन्ट मेगा बैंक लिमिटेडका प्रमुख कार्यकारी अधिकृत (सीईओ) ६३ वर्षीय ज्योतिप्रकाश पाण्डे पक्राउ परेका छन्।
✓उनलाई ठगी तथा आपराधिक विश्वासघातको गम्भीर आरोपमा केन्द्रीय अनुसन्धान ब्युरो (सीआईबी) को समन्वयमा जिल्ला प्रहरी कार्यालय सिन्धुलीले नियन्त्रणमा लिएको हो।
✓प्रहरीका अनुसार पाण्डे आफ्नो मोबाइल फोन स्विच अफ गरी फरार हुन खोजिरहेका थिए।

काठमाडौँ । नेपाल इन्भेस्टमेन्ट मेगा बैंक लिमिटेडका प्रमुख कार्यकारी अधिकृत (सीईओ) ६३ वर्षीय ज्योतिप्रकाश पाण्डे पक्राउ परेका छन् । उनलाई ठगी तथा आपराधिक विश्वासघातको गम्भीर आरोपमा केन्द्रीय अनुसन्धान ब्युरो (सीआईबी) को समन्वयमा जिल्ला प्रहरी कार्यालय सिन्धुलीले नियन्त्रणमा लिएको हो ।

यसरी भयो पक्राउ

प्रहरीका अनुसार पाण्डे आफ्नो मोबाइल फोन स्विच अफ गरी फरार हुन खोजिरहेका थिए । मङ्गलवार राति करिब ८ बजे सिन्धुलीको कमलामाई नगरपालिका–६ स्थित मदन भण्डारी राजमार्गमा सवारी चेकजाँचका क्रममा उनलाई पक्राउ गरिएको थियो । सीआईबीले उनको खोजतलासका लागि देशभर पत्राचार गरेको थियो ।

मुख्य आरोप र घटनाको पृष्ठभूमि

पाण्डेमाथि मुख्यतः दुईवटा विषयमा अनुसन्धान भइरहेको छ:

१. स्मार्ट टेलिकमको सम्पत्तिमा बेइमानी:

अनुमतिपत्र नवीकरण नगरेका कारण २०८० वैशाख ३ मा स्वतः रद्द भएको ‘स्मार्ट टेलिकम प्रालि’ को सम्पत्ति व्यवस्थापनमा पाण्डेले बदनियत राखेको पाइएको छ । नियमानुसार उक्त टेलिकमको सम्पत्ति र पूर्वाधार नेपाल दूरसञ्चार प्राधिकरणको नियन्त्रणमा रहनुपर्ने भए पनि, लोन रिकभरी कमिटी (एलआरसी) को अध्यक्ष रहेका पाण्डेले सरकारको हक टुटाउने उद्देश्यले लिलामी प्रक्रिया अगाडि बढाएको प्रहरीको दाबी छ ।

२. ४० करोड रुपैयाँ ठगी:

बैंकले २०८२ असोज ३ गते निकालेको लिलामी सूचनामा उल्लेखित सर्तअनुसार ४० करोड रुपैयाँ ठगी भएको आरोप छ । लिलामीमा रहेका उपकरण जडान भएका घर–जग्गा धनीको घरबहाल र विद्युत् महसुलबापतको सो रकम बोलपत्रदाताबाट उठाइएको थियो । तर, बैंकले उक्त रकम घरधनी र विद्युत् प्राधिकरणलाई नबुझाई आफैँसँग राखेर ‘आपराधिक विश्वासघात’ गरेको अनुसन्धानले देखाएको छ ।

कानुनी प्रक्रिया

पक्राउ परेका पाण्डेमाथि मुलुकी अपराध संहिता, २०७४ अन्तर्गतको कसुरमा अनुसन्धान सुरु गरिएको छ । सीआईबीका प्रवक्ता एवं प्रहरी वरिष्ठ उपरीक्षक शिवकुमार श्रेष्ठका अनुसार, रद्द भइसकेको कम्पनीको सम्पत्तिमाथि बैंकले गरेको लिलामी र आर्थिक अपचलनको विषयलाई प्रहरीले गम्भीरताका साथ लिएको छ ।

हाल उनलाई काठमाडौँ ल्याएर थप कानुनी कारबाही अघि बढाउने तयारी भइरहेको छ । यो घटनाले बैंकिङ क्षेत्र र ठुला व्यावसायिक घरानाहरूमा तरङ्ग पैदा गरेको छ ।

बकपत्र संवाददाता

बकपत्र डटकम-नेपालकाे सुशासन, सामाजिक न्याय र समृद्धिकाे क्षैत्रमा काम गर्ने डिजिटल पत्रिका हाे।